mohamed kassab
Admin
عدد المساهمات : 478
تاريخ التسجيل : 22/08/2009
العمر : 59
الموقع : regaleletfaa
 | موضوع: قصيدة كلنا واحد  الخميس مايو 12, 2011 4:47 pm | |
| قصيدة كلنا واحد
للشاعر
رفاعى لبيب نصر
ثوب العدالة إنفرد والترزى كان واحد ...
غنى وفقيرلو لبس هو المقاس واحد
رئيس .. وزير ... ينحجــــــــــــــز ....
كله فى قفص واحـــــــــــــــــــــــد
خفى عليــــــــــــــــــــــــنا يا ثورة ....
وخدينا واحــــــــــد واحــــــــــــــــــد
وسيبى عمــــــــــــــــــــــــــدة بلدنا ....
خليه آخــــــــــــــــــــر واحـــــــــــــــد
اتارى العمدة وولادة ....
اتحطوا فى قفص واحد
بقى كدة يا عمدة ....
دا انا كنت مفكرك واحد
نهبت خيرنا وارضنا ...
ولا سبتش قيراط واحد
وعملت مجلس لسرور ....
والشريف كمان واحد
علشان ما جاب لك عز ....
دق الحديد وماسبش سيخ واحد
وشيخ الغفر حبيب ....
ربطنا واحد واحد
وولدك يبص ويضحك ....
وعامل علينا واحد
وولدك الثانى خد الحجج ....
وبصمنا واحد واحد
واديت نظيف الاقية ....
وما روى ولا غيط واحد
ومات زرعنا كلنا ....
ولا فضل عود واحد
وبعت للغرب ارضنا ....
ولا شغلوا ولا واحد
زرعوا وسقوا وحصدوا ....
ولا دفعوا جنية واحد
وقروض من بنوك بلدنا .....
وهربوا واحد واحد
كفر الصهاينة حبايبك ....
والمصلحة بينكم واحد
طلبوا الغاز من ارضك ....
ووصل لهم واحد واحد
واحنا يا دوب نصيبنا ....
انبوبة لكل ميت واحد
حبايبك معاك يا عمدة ....
جولك واحد ورا واحد
ودى دعوة من مظلوم....
تتحطوا فى قفص واحد
حكمة ربنا العزيز ....
جعلنا كلنا واحد
| |
|
